கதைப்படி, ஹீரோ சசிகுமாரையும், செகண்ட் ஹீரோ நரேஷையும் கும்மிருட்டில், கொட்டும் மழையில், கொலை வெறியோடு மூர்க்கத்தனமாக ஒருத்தர் துரத்த, அவரிடமிருந்து ஒருவழியாக தப்பி பிழைக்கும் இருவரும் சென்னையில், பொய் வேஷம் போட்டு பிழைப்பு நடத்தும் கிராமத்து நண்பன் கஞ்சா கருப்பு, தங்கியிருக்கும் அறைக்கு அடைக்கலம் தேடி வருகின்றனர். அங்கு கருப்பு மட்டுமல்ல, அடுத்தடுத்த வீடுகளில் வசிக்கும் மற்றவர்களும், இவர்கள் இருவருக்கும் அடைக்கலம் தர மறுக்க, ஹவுஸ் ஓனர், பேராசிரியர் ஞானசம்பந்தம் மட்டும் தீர்ப்பு நான் தான் சொல்வேன்… என்று, இருவரது முகத்திலும் ஒளி தெரிவதாக சொல்லி, கருப்புவின் அறையில் இவர்களை சேர்த்துக்கொள்ள சொல்வதுடன் சசிக்கு, தன்மகளையும் கட்டி தரும் முடிவில் இறங்குகிறார்.

இதுஒருபுறம் இருக்க, சிட்டிக்கு வந்த இருவரும் ஞானவேல் அண்ணாச்சியின் பெட்ரோல் பங்கில் வேலை பார்த்து கொண்டே, பார்ட் டைமாக ஒரு நிறுவனத்தை ஆரம்பித்து, அதில் பல பேருக்கு வேலை வாங்கி தருகின்றனர். இதைப்பார்த்து இவர்களது வீட்டின் அருகில் சினிமா டான்ஸராக இருக்கும் ஹீரோயின் சுவாதிக்கு-சசிக்குமார் மீதும், பெட்ரோல் பங்கில் உடன் வேலைபார்க்கும் நிவேதாவிற்கு-நரேஷ் மீதும் காதல் கண்ணை மூடிக்கொண்டி வருகிறது. இப்படி தாங்களும் வளர்ந்து சைடில் இருப்பவர்களையும் வாழவைக்கும் சசிகுமார், நரேஷ் இருவர் மீதும் பைத்தியார ஆஸ்பத்திரியில் இருந்து தப்பி வந்த பைத்தியங்கள்… எனும் குற்றச்சாட்டு இண்டரவெல்லுக்கு முன் இடியென வந்து விழ, அவர்களை தேடிவந்த கிராமத்து ஆசாமிகளுடன் கிளம்பினார்களா…? இல்லை, தாங்கள் பைத்தியம் இல்லை என்பதை நிரூபித்து, தாங்கள் விரும்பிய வாழ்க்கையை வாழ்ந்தார்களா…? என்பது போராளி படத்தின் போராட்டமான மீதிக்கதை!

சிலோன் என்ற வார்த்தையே எனக்கு பிடிக்காது, இவளுக்கு சிலோன் பரோட்டா வேண்டுமாம் என்பது உள்ளிட்ட டச்சிங் டயலாக் பேசியபடி இளங்குமரனாக வரும் சசிகுமார், முன்பாதியில் ஃபிரேம் டூ ஃபிரேம் தான் செம மூளைக்காரர் என்பதை நிரூபித்திருக்கிறார். பின்பாதியில் உறவுகளால் ‌பைத்தியம் ஆக்கப்பட்டதாலோ என்னவோ சற்றே சித்த பிரமை பிடித்தவர் போன்றே தெரிவது மைனஸ்! சசிகுமாரின் முன்பாதி துருதுறுப்பும், சுறுசுறுப்பும் பின்பாதியில் இல்லாமல் இருப்பது படத்தையும் ஸ்லோவாக்கி விடுவதை இயக்குநர் நினைத்திருந்தால் தவிர்த்திருக்கலாம்!

குறும்பு நரேஷ், அல்லாரி நரேஷாக தெலுங்கில் செம பிரபலம் என்றால், தமிழில் குறும்பு படத்திற்குப்பின் மீண்டும் இப்பொழுது தான் வந்திருக்கிறார். சுயநிலை இழக்கும் இடங்களில் நடிப்பில் மனுஷன் வெளுத்து வாங்கியிருக்கிறார்.

சுவாதி, நிவேதா, வசுந்த்ரா மூவருமே முக்கிய பங்காற்றும் நாயகி என்றாலும், மூவரில் பின்பாதியில் ஆட்டுக்கார அலமேலு… எனும் ரீதியில் ஈட்டி, கம்பும் கையுமாக வீராவேசமாக வரும் வசுந்த்ரா பிரமாதம். கஞ்சா கருப்பு, பரோட்டா சூரி, ஜெயபிரகாஷ், ஞானசம்பந்தாம், ஞானவேல், நமோ நாராயணன் உள்ளிட்ட எல்லோரும் பாத்திரமறிந்து பளிச்சிட்டுள்ளனர்.

சுந்தர்.சி.பாபுவின் அதிரடி இசை, எஸ்.ஆர்.கதிரின் அழகிய ஒளிப்பதிவு உள்ளிட்ட ப்ளஸ் பாயிண்ட்டுகளுடன் இயக்குநர் பி.சமுத்திரகனி, போராளி படத்தில் நிறையவே போராடி இருப்பது தெரிகிறது. அதற்கான வெற்றி எவ்வளவு என்பது ரசிகர்களின் தீர்ப்பிலேயே இருக்கிறது.

போராளி – புத்திசாலி! அதிர்ஷ்டசாலியா…?!

கதைப்படி வெவ்வேறு வேலைகள், லட்சியங்கள் உண்டென்றாலும், 24 மணிநேரமும் ஒன்றா‌கவே இருக்கும் நண்பர்கள் கார்த்திக், சுந்தர், சங்கர், ரம்யா, பத்மினி, மாதேஷ், ரமேஷ் உள்ளிட்டவர்கள். ஆண், பெண் இருபாலரும் உண்டென்பதால் இவர்களிடையே சிலருக்குள் காதலும், சிலரிடையே வெறும் சகோதரத்துவமும், நாளொருமேனியும் பொழுதொரு வண்ணமுமாய் பீரும், பிராந்தியுமாக தழைத்தோங்குகிறது. ஒரு கட்டத்தில் யாமினி எனும் அழகிய யுவதியை சில நாட்கள் பழகி, பின் இருவருக்கும் ஒத்துப்போனால் தன் காதலியாக அடையும் எண்ணத்தில், தங்கள் டீமுக்கு அழைத்து வருகிறார் சுந்தர். ஆரம்பத்தில் யாமினியை, அந்த டீமில் சேர்த்து கொள்ள மறுத்து, கலாய்க்கும் டீமின் ஜீனியஸ் என்றழைக்கப்படும் கார்த்திக், பின் யாமினியின் கண் அசைவுகளிலும், காதல் வலையிலும் கவிழ்கிறார். நட்பு தப்பாய் போன வருத்தம் ஒருபக்கம் இருந்தாலும், நட்பிற்காக காதலை விட்டுக்கொடுக்கும் சுந்தர், கார்த்திக்கின் தங்கைக்கும், வாழ்க்கை கொடுக்கிறார்

கார்த்திக்கும்-யாமினியும் கல்யாணம் கட்டிக்கொண்டு இல்லறத்தில் இனிமை காண்கின்றனர். சில வருடங்கள் உருண்டோடியதும், இவர்கள் வாழ்க்கையில் குறுக்கிடும் சின்னதொரு விபத்து, கார்த்திக்கின் மனநிலையில் மாற்றங்களைக் கொண்டு வர, சிறந்த புகைப்பட கலைஞராக வர துடிக்கும் கார்த்திக், காதல் மனைவியை துன்புறுத்தும் சைக்கோவாக மாறுகிறார். கணவரின் சைக்கோ தனங்களை ‌பொறுத்துக் கொண்டு கார்த்திக்கின் மனைவி யாமினியும், சுந்தர் உள்ளிட்ட நண்பர்களும், கார்த்திக்கை உலகத்தின் நம்பர்-1 புகைப்பட கலைஞராக மாற்ற உறுதுணையாக இருப்பதே “மயக்கம் என்ன” படத்தின் மீதிக்கதை!

ஜூனியஸ் கார்த்திக்காக, தனுஷ் மெய்யாலுமே ஜீனியஸாக தன் நடை, உடை, பாவனைகளை மாற்றிக்கொண்டு நடித்திருப்பது படத்தின் பெரிய ப்ளஸ். அண்ணன் செல்வராகவன் இயக்கத்தில் மட்டும், தம்பி தனுஷூக்கு ஒரு லுக் வழக்கம் போலவே இப்படத்திலும் கிடைத்திருக்கிறதென்றால் மிகையல்ல! என்னதான் மனநலம் பாதிக்கப்பட்டவர், கோபக்காரர் என்றாலும், ஆத்திரத்தில் மனைவியை தள்ளிவிட்டு, அவரது கரு கலையை காரணமாகும் தனுஷ், விபரம் புரிந்ததும் வருத்தம் தெரிவிப்பதோடு நிறுத்திக்கொள்கிறார். அவ்வாறு இல்லாமல் வீட்டில் படிந்திருக்கும் இரத்த கறையை துடைக்க உதவி செய்திருந்தால் இன்னும் நன்றாக இருந்திருக்கும்!

யாமினியாக, நாயகி ரிச்சா கங்கோபாத்தியாயே நச் தேர்வு! கல் ஆனாலும் கணவன், புல் ஆனாலும் புருஷன் என இந்தகாலத்திலும் வாழும் மார்டன் யுவதி! சில இடங்களில் நடிப்பில் தனுஷையே ஓரங்கட்டி விடுகிறார் பலே! பலே!! நாயகன், நாயகி தவிர சுந்தராக வரும் சுந்தர், சங்கராக வரும் மதி, ரம்யா எனும் சோனி, பத்மினியாக-பூஜா பாலு, மாதேஷாக-ரவிபிரகாஷ், ரமேஷாக-ராஜிவ் சவுத்ரி உள்ளிட்டவர்களும் பிரமாதம்!

ஜி.வி.பிரகாஷ்குமாரின் இசையும், ராம்ஜியின் ஒளிப்பதிவும் படத்தின் பெரிய பலம்! அதிலும் ஜி.வி.பிரகாஷின் இசையில், தனுஷ் பாடியிருக்கும் “ஓட, ஓட…” பாடலும், “காதல் என் காதல்…” உள்ளிட்ட படத்தின் ஆறு பாடல்களுமே காதிற்கினிய கானங்கள்!

பாடல்கள் அனைத்தையும் எழுதியது போன்றே, படத்தையும் கவித்துமாக எழுதி, இயக்கி இருக்கிறார் செல்வராகவன்! போலித்தனம் இல்லாமல், இன்றைய சமூகத்தை அபட்டமாக படம் பிடித்து காட்டியிருக்கும் செல்வராகவன், அதை இன்னும் சற்றே, விறுவிறுப்பாக சொல்லி இருந்திருந்தார் என்றால் “மயக்கம் என்ன”! தயக்கம் இல்லாமல் “பி” மற்றும் “சி” சென்டர்களையும் கவர்ந்திருக்கும்!

மொத்தத்தில் “மயக்கம் என்ன”, “ஏ” கிளாஸ் ரசிகர்கள் “வியக்கும் படம்ணே!”

பார்த்திபனின் அப்பா சம்பத்ராம், ஆசை ஆசையாய் பார்த்து வந்த போலீஸ் வேலையை அம்போ என விட்டுவிட்டு வேறு வேலை, வேறு ஊர் என குடும்பத்தோட குடிபெயர காரணமாகிறார் வில்லன் மிலிந்த் சோமன். அவரை பழிவாங்க, தன் அப்பா மற்றும் குடும்பத்திற்கே தெரியாமல் அநாதை என்று சொல்லி ஐ.பி.எஸ். ஆபிஸராகும் பார்த்திபன், உத்தியோகத்தில் நேர்மையாகவும், புதுமையாகவும் செயல்பட்டு நல்ல பெயர் எடுக்கிறார். இவரது நற்பெயரால், கெட்டதை மட்டுமே சம்பாதித்து வரும் உயர் அதிகாரியின் கைகளில், பார்த்திபன் அநாதை அல்ல, அவருக்கு குடும்ப பின்னணி உண்டு எனும் தகவல் ஆதாரபூர்வமாக கிடைக்கிறது. அதையே காரணமாக வைத்து பார்த்திபனை போலீஸ் உத்தியோகத்தில் இருந்து தூக்குகிறார் அந்த அதிகாரி! அப்புறம்? அப்புறமென்ன…? தானும், தன் தந்தையும் போலீஸ் வேலையை விட்டு போக காரணமாக இருந்தவர்களையும், சமூகத்தில் ஒழுக்கம் கெட காரணமாக இருப்பவர்களையும் பார்த்திபன் எப்படி அழிக்கிறார் என்பது வித்தகன் படத்தின் விஸ்வரூப மீதிக்கதை!

போலீஸ் – தாதா என இரு வேறு துருவங்களில் நின்று, சமூகத்தை காக்கும் வித்தகனாக வித்தியாசமான வேடங்கள் ஏற்றிருக்கும் பார்த்திபன், மற்ற ஹீரோக்கள் மாதிரி பஞ்ச் டயலாக் பேசி ரசிகர்களின் செவிகளை பஞ்சராக்காமல், “நீங்க துப்பு துலக்கிட்டீங்க… இங்க எவனோ துப்பிட்டு போயிருக்கான்…” என்பது உள்ளிட்ட எதிராளிகளை டேஞ்சர் ஆக்கி, டின்ஜர் போட்டு விடும் டயலாக்குகளில் ஒரு சேர கண்ணையும், கருத்தையும் கவருகிறார். நீண்ட இடைவெளிக்குப்பின் பார்த்திபன் படம் பார்த்த திருப்தி ஒன்று போதும் என்றாலும், முன்பாதி போலீஸ் பார்த்திபனின் கம்பீரமும், காமெடியும் ஓ.கே. பின்பாதி தாதா பார்த்திபனின் கெட்-அப் ஆங்காங்கே சாதாவாக தெரிவது மைனஸ்!

அழகு பதுமையாக பூர்ணா, பார்த்திபன் செய்யும் கொலை ‌ஒன்றை கண் எதிரே பார்த்தும்கூட அவரை காதலிக்க தொடங்குவது நம்ப முடியாத சுத்த ஹம்பக். மற்றபடி, பூர்ணாவின் புடவையில் வரையப்பட்டிருக்கும் பூக்கள் கூட, கிராபிக்ஸில் மெய்யான பூக்களாய் மலர, மலர வெளிநாட்டு லொகேஷன்களில் டூயட் பாடிய படி பார்த்திபனை காதலிப்பதெல்லாம் சூப்பர்! ஓ.கே.

கடைசிவரை பார்த்திபன் தனக்கேன் வில்லன் ஆனார்…? என்பது தெரியாமலே, பார்த்திபனால் கொல்லப்படும் இண்டர்நேஷனல் வில்லன் மிலிந்த்‌ சோமன், பார்த்திபனின் அப்பாவாக, பொறுப்பான போலீஸ்காரராக ப்ளாஷ்பேக்கில் வரும் சம்பத்ராம், மினிஸ்டர் மோகன் நடராஜன், அவரது கெட்ட மகனாக கொஞ்ச நேரம் வந்து, செத்து போகும் வின்சென்ட் அசோகன், பார்த்திபனுக்கே பின்பாதியில் டானாக வந்து பார்த்திபனாலேயே டப் பென்று சுடப்படும் ரவிசங்கர், ஒருபாடலில் மைக்கும் ‌கையுமாக தோன்றி மறையும் ராக்கி பார்த்திபன்(பார்த்திபனின் ஆண் வாரிசு…) உள்ளிட்ட எல்லோரும் கச்சிதம்!

ஜோஷ்வா ஸ்ரீதரின் இசையில், ரா.பார்த்திபனே 6 பாடல்களையும் எழுதி இருக்கிறார். “இக்குதே கண்கள் விக்குதே…” பாடல் மட்டுமே அடிக்கடி காதில் ஒலிக்குதே… எனப்பாராட்டும்படி இருக்கிறது. ஆண்டனியின் படத்தொகுப்பும், எம்.எஸ்.பிரபு-ராம்நாத் ஷெட்டியின் ஒளிப்பதிவு உள்ளிட்ட ப்ளஸ் பாயிண்ட்டுகளுடன் ரா.பார்த்திபனின் கதை, திரைக்கதை, வசனம், பாடல்கள் இயக்கத்தில் “வித்தகன்” வசனத்திலும், இயக்கத்திலும் பளிச்சிட்டிருக்கிறது!

ஆக மொத்தத்தில் “வித்தகன்”, கெட்டவர்களுக்கு “எமகாதகன்!” ரசிகர்களுக்கு…?!

கதைப்படி திருப்பதி என்ஜினியரிங் கல்லூரி மாணவர் ஜெய் ஆகாஷ். அவருக்கும் தனியார் நிறுவனம் ஒன்றில் வேலை பார்க்கும் நிதி சுப்பையாவிற்குமிடையே உயிருக்கு உயிரான காதல்! நிதி சுப்பையாவின் ஒரு சில நடவடிக்கைகளைப் பார்த்து அம்மணிக்கும், அவரது முதலாளிக்குமிடையில் கள்ளத்தொடர்பு என சந்தேகிக்கும் ஜெய், அதை நேரடியாக கேட்க, நிதிக்கும்-ஜெய்க்குமிடையேயான காதல் மோதலில் முடிகிறது. அதன் விளைவு தன் படிப்பை நண்பர்கள் உதவியுடன் சென்னை வந்து தொடரும் ஜெய்க்கு காதல், கத்திரிக்காய் என்றாலே பாகற்காயாய் கசக்கிறது. கல்லூரியில் யாராவது யாரையாவது காதலித்தார் என்று தெரிந்தால் அவர்களை அடித்து பிரிக்கும் ஜெய், மீது டெய்சி போபனாவிற்கு காதல் வருகிறது. அந்த காதல் கைகூடியதா, இல்லையா…? நிதி சுப்பையா மெய்யாலுமே ஜெய்யுடனான காதலில் துரோகம் செய்தாரா..? இல்லையா…? என்பது காதலன் காதலி படத்தின் யூகிக்க முடியாத மீதிக்கதை!

கல்லூரி மாணவர், ப்ளஸ் குத்துச்சண்டை வீரர் என ‌ஹெவிரோலில் நடித்தும், இயக்கியும் இருக்கும் ஜெய் ஆகாஷூக்கு இப்படத்தில் அவரது இயக்கத்தைவிட நடிப்பு பெட்டர். இவை இரண்டையும்விட நிதி சுப்பையா, டெய்சி போபனா இருவருடனும் கனவிலும், நிஜத்திலும் அடிக்கடி போடும் டூயட்கள் பெட்டர்! டெய்சி, நிதி இருவரும் கிளாமரே கதி என ஒரேயடியாக கவர்ச்சியை நம்பி இருப்பதால் நடிப்பு மிஸ்ஸிங். சுஹானி, ராகுல்தேவ், சுகுமார் என நிறைய பேர் படத்தில் இருக்கிறார்கள். நந்தன்ராஜின் இசை, ஜாக்கிஜானின் ஒளிப்பதிவு எல்லாம் இருக்கிறது.

தன்னை சந்தேகித்து விலகும் காதலுனுக்கு, தன் சந்தேகத்திற்கு அப்பாற்பட்டவள் என புரிய வைத்து, இறந்து தன் இருதயத்தையும் பரிசாக தரும் காதலி எனும் புதிய “தாட்”டை “நச்” சென்று படமாக்கியிருந்தால், ஜெய் ஆகாஷ், ஜெயித்திருப்பார்! ஜொலித்திருப்பார்! “காதலன் காதலி” ஜெய் ஆகாஷூக்கு “தோல்வி தராத தோழி!”

தமிழகத்திலேயே கல்வி அறிவு பெற்றவர்கள் நிரம்பிய கன்னியாகுமரி மாவட்டத்தில்தான் ரவுடிகளும், தாதாக்களும் கூட அதிகமாம். அது ஏன்? அதற்கு காரணம் என்ன…? என்பதை அலசியிருக்கும் இப்படத்தின் கதைப்படி, வெட்டோத்தி எனும் குமரி மாவட்ட, கிராமத்தை சார்ந்த படித்த இளைஞன் சுந்தரம் எனும் கரண், தகுதி இருந்தும் படிப்பிற்கேற்ற வேலை கிடைக்காததால் குடும்பசூழல் காரணமாக கடத்தலில் இறங்குகிறார். கூடவே குமரி மாவட்டத்திலேயே பெரிய கடத்தல் பார்ட்டியும், கள்ளச்சாரய வியாபாரி தாதாவுமான, சிலுவையின் மகள் லூர்து எனும் அஞ்சலியையும் காதலிக்கிறார். கரணின் கடத்தல், காதல் இரண்டும் அவரை சோதித்ததா…? இல்லை சாதிக்க செய்ததா…? என்பது வெட்டோத்தி சுந்தரம் படத்தின் வித்தியாசமும், விறுவிறுப்புமான மீதிக்கதை!

வெட்டோத்தி சுந்தரமான கரண்-பிரமாதம். வாத்தியார் வேலைக்கு படித்துவிட்டு, போலீஸ் வேலைக்கு முயற்சித்து, இரண்டும் கைகூடாமல் கடத்தலில் இறங்கும் கரண், நண்பர் சரவணனுக்காக உயிரையும் கொடுக்க துணிவது ஓ.கே., அதே நேரம் சரவணனால், தன் கல்யாணத்தில் முடிய வேண்டிய காதல், கலாட்டாவில் முடிவதை பொறுத்துக்கொள்வதெல்லாம் ரொம்பவும் ஓவர். என்னதான் உண்மை சம்பவம் என்றாலும் கரண், ‌க்ளைமாக்ஸில் வில்லன்களால் வீழ்த்தப்பட்டு, கண்தெரியாமல் போய், கஷ்டப்பட்டு உயிரை விடுவது உருகாதோர் நெஞ்சையும் உருக வைத்துவிடும் உணர்ச்சிமிகு காட்சிகள். அதில் கரணைத்தவிர வேறு ஒரு நடிகரால் இவ்வளவு உருக்கமாக நடிக்க முடியுமா…? என்பது கேள்விக்குறியே!

துருதுரு லூர்துவாக அஞ்சலி, செம ஜாலி பேர்வழி! மரமண்டை, மரமண்டை என கரனை திட்டிக் கொண்டே தன் காதலை வெளிப்படுத்தும் காட்சிகளில் அஞ்சலி, பாத்திரமறிந்து பளிச்சிட்டிருக்கிறார். அதேநேரம், டைரக்ஷ்ன் டச்சாக அஞ்சலியின் துறுதுறுப்பும், பரபரப்புமே கரணுக்கு வினையாய் வந்து முடிவது வேதனை! வேலையில்லா திண்டாட்டம், அதனால் “சிட்டிசன்” சரவணன் சுப்பையா, குடித்துவிட்டு பண்ணும் கலாட்டா மற்றும் தற்கொலை டிராமாக்கள் உள்ளிட்டவைகளை தவிர்த்திருந்தால் இயக்குநரை இன்னும் அதிகமாக பாராட்டலாம்!

சாலை எனும் பாத்திரத்தில் சரவணனும், அவரது கூட்டாளி ஆப்பையாக வரும் சுப்புராஜூம் காமெடிக்கு, காமெடியும் செய்து நட்புக்காக உருகவும் செய்கிறார்கள். கரண்ட் கஞ்சா கருப்பு, சிலுவை ஜே.எஸ்.பாலாசிங், சண்முகராஜன், போலீஸ் வில்லன் நந்தா சரவணன் உள்ளிட்ட எல்லோருமே பாத்திரமறிந்து நடித்து படத்திற்கு பலம் சேர்த்திருக்கின்றனர். பேஷ்! பேஷ்!!

அழகிய ஆஞ்சமநாயலுவின் ஒளிப்பதிவும், வித்யாசாகரின் மெலோடி பாடல்களும், வி.சி.வடிவுடையானின் எழுத்து, இயக்கத்தில் “தம்பி வெட்டோத்தி சுந்தரம்” படத்தை “அண்ணன் அழகு சுந்தரமாக” ஜொலிக்க செய்திருக்கின்றனர் என்றால் மிகையல்ல!

கதைப்படி ஹீரோ உதய் கார்த்திக், காதலனுக்கும், புருஷனுக்கும் துரோகம் செய்யும் 16 பெண்களை அடுத்தடுத்து தீர்த்துகட்டிவிட்டு, அங்கு இறந்த பெண்களின் இரத்தத்தால் “நான்” என ஆட்டோகிராப்பும் போட்டு வைத்து விட்டு வருகிறார். காவல்துறையும், கஷ்ட ஜீவனம் நடத்தும் இவர் மீது காதல் கொள்ளும் கதாநாயகியும் ஒருசேர இவர் தான் குற்றவாளி என தீர்மானித்து, தக்க சன்மானம், அதாங்க தண்டனை வழங்க களம் இறங்கும் வேலையில், அப்ரூவராக மாறும் சைக்கோ ஹீரோ உதய், தான் தடம் மாறிய பெண்களை கொலை செய்யக்காரணம், தன் தாய் என கோர்ட்டில் மீடியாக்களை கூட்டி வைத்து கொந்தளிக்கிறார்! கூடவே தான் “சிவன்”, தப்பு செய்யும் பெண்களை தீர்த்து கட்ட தனக்கு ஃபுல் ரைட்ஸ் இருக்கிறது என்று சிவனாட்டம் போடும், ஹீரோவின் தாய் செய்த தவறென்ன? ஹீரோவிற்கு தரப்பட்ட தண்டனை என்ன…? என்பது தான் “நா சிவனாகிறேன்” படத்தின் மொத்த கதையும்!

ஹீரோ உதய் கார்த்திக், பாம்பும், கையுமாக தரும் பரமசிவன் போஸ் மாதிரியே, அவரது நடிப்பும் ஓ.கே. அதற்காக அவர் பண்ணும் கொலைகள் எல்லாம் ரொம்ப ஓவர். ஹீரோயின் வர்ஷா, அப்பா பிரேம்குமார், தடம்மாறிடும் தாயாக வரும் நயானி தீட்சித் உள்ளிட்ட எல்லோரும் பார்த்திரத்திற்கேற்ற பளிச் தேர்வு!

கே.கோகுலின் ஒளிப்பதிவு, கே.எஸ்.ம‌னோஜின் இசை இரண்டும், வி.கே.ஞானசேகரின் இயக்கத்திற்கு பக்கபலம் என்றாலும், படத்தில் நிறைய பலவீனங்கள் தென்படுவது மைனஸ்.

சைக்கோ உதய் மீது ஹீரோயின் வர்ஷாவுக்கு காதல் வருவது எப்படி? என்பது உள்ளிட்ட இன்னும் பல லாஜிக் மிஸ்டேக் கேள்வி‌களை கேட்காமல் போனால் “நா சிவனாகிறேன்” – படத்தை “சிவனேனு” பார்த்துவிட்டு வரலாம்!

கதைப்படி, தமிழக உள்துறை மந்திரியுடன் கூட்டணி அமைத்துக் கொண்டு பாகிஸ்தான், ஆப்கானிஸ்தான் தீவிரவாதிகள், தென் இந்தியாவில் குறிப்பாக சென்னையில் பல இடங்களில் பாம் வைத்து, பல உயிர்களை தீர்த்துகட்ட திட்ட தீட்டி சென்னையில் ஊடுருவுகின்றனர். இதனிடையே பெரிய அளவில் கள்ளநோட்டு அச்சடிப்பது, விபச்சாரத்திற்கு பெண்களை கடத்தி விற்பது என எண்ணற்ற சமூக விரோத செயல்களில் ஈடுபடும் மந்திரி கும்பலின் முகத்திரையை கிழிக்க முயற்சிக்கின்றனர் பத்திரிக்கை நிருபர்களான ஜெனிலியாவும் அவரது சகாக்களும். தங்களை பற்றிய உண்மை அனைத்தையும் தெரிந்து கொள்ளும் அவர்களை கூண்டோடு கைலாசம் அனுப்ப நினைக்கிறது ரவுடி கும்பல்! அதில் அதிர்ஷடவசமாக தப்பி பிழைக்கும் ஜெனிலியா, மந்திரி கும்பலின் குண்டு வெடிப்பு சதியை எச்சரிக்கை கடிதமாக எழுதி, அதை நிச்சயம் தடுப்பேன்…என்று எழுதி வைத்துவிட்டு, எதேச்சையாக அதனடியில் வேலாயுதம் என்று ஒரு பெயரையும் குறித்து வைத்துவிட்டு குற்றுயிரும் கொலை உயிருமாக பொதுமக்கள் சிலரது உதவியோடு மருத்துவமனையில் மரணபடுக்கையில் கிடக்கிறார்.

ஜெனிலியாவின் கற்பனை கதாபாத்திரமான வேலாயுதமாக, கிராமத்தில் பால் விற்கும் தொழில் செய்யும் வேலாயுதமான விஜய், எப்படி விஸ்வரூபமெடுக்கிறார்? ஆக்ஷ்ன் காட்சிகளில் எவ்வாறு அடித்து தூள் பரத்துகிறார்..? மந்திரி கும்பலுடன் கூட்டணி அமைத்து, நாச வேலைகளில் இறங்கும் தீவிரவாத கும்ப‌லை எதுமாதிரி எல்லாம் ஒழித்து கட்டுகிறார்…? என்பது தான் “வேலாயுதம்” படத்தின் மீதிக்கதை மட்டுமல்ல… மொத்த கதையும்கூட!

வேலாயுதமாக விஜய், தங்கை பாசத்துடன் கிராமத்தில் செய்யும் சேட்டைகளில் ஆகட்டும், சிட்டிக்கு வந்து தீவிரவாதிகளையும் அவர்களுக்கு அடைக்கலம் தரும் மந்திரி கும்பலையும் வேட்டையாடுவதிலாகட்டும் அக்மார்க் விஜய் முத்திரையை பதித்து, தன் பரமவிசிறிகளை மட்டும் திருப்தி படுத்தியிருக்கிறார். பிற தரப்பினரையும் திருப்திபடுத்த, அரசியலில் புது முடிவு எடுத்து திருப்திபட்டுக்கொண்ட மாதிரி, நடிப்பிலும் புதிய முயற்சியில் இறங்கலாம் விஜய்…! மற்றபடி காதல், மோதல், காமெடி, டிராஜிடி, சென்டிமெண்ட் எல்லாவற்றிலும் வழக்கம் போலவே ஸ்கோர் செய்து படத்தை ஜனரஞ்சகமாக தூக்கி நிறுத்த இயக்குநருடன் சேர்ந்து ரொம்பவே மெருகேட்டிருக்கிறார் விஜய்!

பெண் பத்திரிக்கை நிருபராக ஜெனிலியா, விஜய்யின் கிராமத்து முறைப் பெண்ணாக ஹன்சிகா மோத்வானி, விஜய்யின் பாசக்கார தங்கையாக சரண்யா மோகன், மூவரில் தங்கை சரண்யா மோகனுக்கே முக்கியத்துவமும், நடிக்கும் வாய்ப்பும் ஜாஸ்தி என்பதால் க்ளைமாக்ஸில் இறந்தும் நம் மனதில் நிற்கிறார்.

ஸ்பீடாக சந்தானம் பண்ணும் சேட்டைகள் வழக்கம் போலவே கொஞ்சம் காமெடி, நிறைய காமநெடி. பாண்டியராஜன், எம்.எஸ்.பாஸ்கர், பிளாக் பாண்டி, பரோட்டா சூரி என எக்கச்சக்க பேர் படத்தில் உண்டென்றாலும், நல்ல போலீஸாக வரும் சாயாஜி ஷிண்டே உள்ளிட்டவர்களே நடிப்பில் மிளிர்கிறார்கள், தெரிகிறார்கள் என்பது வேலாயுதம் படத்தின் பலம், பலவீனம் இரண்டுமாகும்!

படத்தின் ஆரம்ப காட்சியில் ஆப்கானிஸ்தான், பாகிஸ்தான்… தீவிரவாதிகள் குண்டு வெடிப்பு, உள்துறை அமைச்சர் சதி என விஜயகாந்த் பட ரேன்ஜூக்கு பில்-டப்புகளை கொடுத்துவிட்டு, அடுத்த ரீலிலேயே தங்க‌ை பாசம், கிராமத்து பால்காரன் என படத்தின் முன்பாதி மொத்தமும் காமெடி விஜய்யையே காட்டி, பின்பாதி படத்தில் ஆக்ஷ்னில் அடித்து தூள் பரத்துவது என்னதான் எம்.ஜி.ஆர்., காலத்து புதிய டிரண்ட் என்றாலும், சற்றே போரடிப்பதும், அது விஜய்க்கு பொருந்தாமலிருப்பதும், “வேலாயுதம்” படத்தின் மைனஸ் பாயிண்டுகளில் ஒன்று. அதை முடிந்தவரை மறக்கடித்து, மழுங்கடித்திருக்கிறது. விஜய் ஆண்டனியின் இதமான இசையும், ப்ரியனின் பதமான ஒளிப்பதிவும் படத்திற்கு ஆறுதல்!

ஒருபக்கம் வேகமாக ஓடும் ரயிலை நிறுத்துவது, பொது மக்களை தீவிரவாதிகளிடமிருந்து காப்பாற்றுவது, மற்றொரு பக்கம் தங்கை பாசம், காதலி மீதான நேசம் என விஜயகாந்த் பாணியில், விஜய்யின் கொள்ளை பரப்பு படமாக, ஆஸ்கர் ரவிச்சந்திரனின் துட்டில், “வேலாயுதம்” படத்தை எடுத்து இருக்கிறார் இயக்குநர் ஜெயம் ராஜா! பலே.பலே!!

ஆக மொத்தத்தில் “வேலாயுதம்” – விஜய்யின் “ஆயுதம்!”

அநியாயத்தை கண்டால் அதை அப்படியே கட்டம் கட்டி பத்திரிக்கையில் பிரசுரித்து பல தரப்பையும் எதிர்க்கும் துடிப்பும், துணிவும் மிக்க பத்திரிக்கை நிருபர் ஸ்ரீகாந்த்! இதனால், அதிகாரிகள், அரசியல்வாதிகள் என பல தரப்பிலும் எக்கச்சக்க எதிரிகளை சம்பாதித்து வைத்திருக்கும் ஸ்ரீயின் காதலி சோனியா அகர்வால் கடத்தப்படுகிறார். சோனியாவை கடத்தியது யார்…? கடத்தப்பட்ட சோனியா மீட்கப்பட்டாரா இல்லையா…? காதலியை மீட்க ஸ்ரீகாந்த் என்ன செய்தார்? என்பதுதான் “சதுரங்கம்” படத்தின் மொத்த கதையும்!

இதுநாள் வரை ரொமாண்டிக் ஹீரோவாக மட்டும் உலா வந்த ஸ்ரீகாந்த் ஆக்ஷ்ன் ஹிரோ அவதாரம் எடுத்திருக்கிறார். குட்டை தலைமுடி, மூக்கு நுனி கோபம், கண்ணியமான பார்வை என்று மிடுக்காக மிரட்டியிருக்கிறார் ஸ்ரீ. ஆக்ஷ்ன் ஹீரோ ஆகிவிட்டதால் ரொமாண்டிக்-லவ் எபிசோட்டிற்கு லீவும் கொடுத்து விடவில்லை. அந்தப்பக்கமும் சோனியாவுடன் சும்மா புகுந்து புறப்பட்டு, மனிதர் எல்லா தரப்பு ரசிகர்களையும் திருப்திபடுத்தி இருக்கிறார் என்றால் மிகையல்ல! பத்திரிக்கை நிருபர் ஸ்ரீகாந்தின் முகத்தில் இப்பட இயக்குநரும், முன்னாள் பத்திரிக்கையாளருமான கரு.பழனியப்பன் தெரிகிறார் என்பதும் மிகையல்ல!

சோனியா அகர்வாலும் தன் பங்கிற்கு நடிப்பில் மிளிர்ந்திருக்கிறார். தன் காதலர் வேலை பார்க்கும் பத்திரிக்கையை ரெகுலராக வீட்டிற்கு பேப்பர் போடும் பையனை போட சொல்வதில் தொடங்கி கடத்தப்பட்ட இடத்தில் கிடைக்கும் கேப்பில் போனை திருடி காதலனுக்கு தகவல் சொல்லும் காட்சிகள் வரை ஒவ்வொன்றிலும் தனி முத்திரை பதித்திருக்கும் சோனியாவிற்கும், இந்தபடம் இழந்த மார்க்கெட்டை பெற்று தருமென்றால் மிகையல்ல!

ஸ்ரீ-சோனியா ஜோடி மாதிரியே கணேஷ் யாதவ், “பிதாமகன்” மகாதேவன், மணிவண்ணன், ஸ்ரீமன், மயில்சாமி, இளவரசு என ஒவ்வொருவரும் பாத்திரத்திற்கேற்ற பளிச் தேர்வு

வித்யாசாகரின் இனிமை கொஞ்சும் மெலடி இசையும், திவாகரின் இயற்கை எழில் கொஞ்சும் ஒளிப்பதிவும் படத்தின் பெரிய பலம்! என் காதலியை கடத்தலைங்கறதுக்காக நீ நல்லவனாயிட முடியாது… எனும் ஒற்றைவரி டயலாக்போதும், இயக்குநர் கரு.பழனியப்பனின் சாதுர்யத்தை பறைசாற்ற! அதேநேரம் க்ளைமாக்ஸ் சண்டை காட்சியில் மிஸ்ஸாகும் லாஜிக் விஷயங்களில் இன்னும் சற்றே கூடுதல் கவனம் செலுத்தியிருந்தால் “சதுரங்கம்” சபாஷ் என்றிருக்கும் மொத்த திரையரங்கமும்!

கதைப்படி, அனாதை ஏகனுக்கு அடைக்கலம் தரும் தாதா திலகன், ஏகனை தனது வலதுகரமாகவும் வளர்த்து வைத்துக்கொள்கிறார். இது திலகனின் மகன் முரளிக்கு பிடிக்கவில்லை. அதன் விளைவு ஏகனிடமே தொழில் பயிற்சி பெற்ற ‌முரளி, ஒரு கட்டத்தில் ஹீரோ ஏகனையே போட்டு தாக்குகிறார். குத்துயிரும், கொலை உயிருமாக ஓடும் நதியில் தூக்கி வீசப்படும் ஏகன், மலை கிராமத்து மக்களால் பல நாட்கள் மூலிகை வைத்தியம் பார்த்து காப்பாற்றப்படுகிறார். அதுவரை மனித உயிரின் மதிப்பு தெரியாமல் வாழ்ந்த ஏகன், அங்கு அன்பு, பண்பு, மனித உயிரின் மதிப்பு உள்ளிட்ட எல்லாவற்றையும் கற்றுக்கொண்டு அமைதியாக வாழ முற்படுகிறார். ஆனால் ஏகன் இருக்கும் இடம் தெரிந்து, தேடி வந்து அவரை திரும்பவும் தன் ஏரியாவுக்கு அழைக்கிறார் திலகன். அதற்கு ஏகனோ, நான் என் இறுதிகாலத்தை இங்கேயே அன்பும் அமைதியுமாக கழித்து விடுகிறேன் என்று மறுக்கிறார். திலகன் விடாபிடியாக ஏகனை தன் கோட்டைக்கு அழைத்து போகிறார். ஏகன் தாதாயிசத்தை தொடர்ந்தாரா…? இல்லை தப்பி தருந்தி வாழ்ந்தாரா…? என்பது க்ளைமாக்ஸ்!

தாதாயிசம், ஹீரோயிசம் எல்லாம் பல ஆக்ஷ்ன் படங்களில் பார்த்த சமாச்சாரங்கள் தான் என்றாலும் அதை முற்றிலும் புதுமையாக சொல்லியிருக்கிறார் திரைப்பட கல்லூரி மாணவரான இயக்குநர் ஏகன் என்பது தான் ஹைலைட்! அதிலும் அவரே இசையமைப்பாளர், அவரே நாயகர்… என்பது ஏகனுக்கு பெரிய பலமாகிவிட்டது இப்படத்தை பொறுத்தவரை…

முன்பாதியில் ஏன்..? எதற்கு…? என்று கேட்காமல் திலகன் சொல்பவர்களை எல்லாம் தீர்த்து கட்டுவதில் ஆகட்டும், பின்பாதியில் மலைகிராம மக்களின் அன்பில் கரைந்து போவதில் ஆகட்டும் இரண்டிலுமே நடிப்பில் கரைகண்டவராக மிளிர்ந்திருக்கிறார் நாயகர் ஏகன் என்றால் மிகையல்ல. கத்தி எடுத்தவனுக்கு கத்தியால் தான் சாவு… என கச்சிதமாக சொல்லி இருக்கும் இவரது பாத்திரம், இன்றைய இளைஞர்களுக்கு ஒரு பாடம். கத்தியும், கட்டையும் பிடித்து உயிரை எடுத்த கைகளால் அதே கட்டையும், கத்தியும் பிடித்து பம்பரம் செய்து சிறுமிக்கு தரும் காட்சிகளில் நெகிழ வைத்துவிடுகிறார் மனிதர் பலே, பலே!

அச்சன் பாத்திரத்தில் சீனியர் தாதாவாக திலகன் மிரட்டியிருக்கிறார். அப்பாத்திரத்தில் திலகனைத்தவிர வேறு யாரையும் நினைத்துக்கூட பார்க்க முடியாது. அத்தனை பொருத்தம் அச்சனின் பாத்திரம். ஏகன் திலகம் மாதிரியே திலகனின் மகனாக வந்து, க்ளைமாக்ஸில் ஏகனையே தீர்த்துகட்டும் முரளி, அவரது ஆளான மணியன் பிரதீப், மலைகிராம இளம்விதவையாக படத்தின் பிற்பாதியில் வந்து ஹீரோ ஏகனையும், ஏகப்பட்ட ரசிகர்களையும் ஒருசேர கவரும் வினிதா, அவரது மகளாக துருதுருவென வளைய வரும் பேபி சங்கமித்ரா உள்ளிட்டவர்களும் உயிரின் எடை படத்தின் பலமான பாத்திரங்களாக ஜொலித்திருக்கின்றனர். இவர்களுடன் பம்பர் ஸ்டாராக வந்து பம்மும் கணேஷ்பாபுவும், வில்லனாக சில நிமிடங்களே வந்தாலும் விஸ்வரூபம் எடுத்திருக்கும் மாட்டுரவி – தர்மராஜ் உள்ளிட்டவர்களும் பேஷ் பேஷ் சொல்லவைத்து, உயிரின் எடைக்கு எடையை கூட்டியுள்ளனர் என்றால் மிகையல்ல!

முற்பாதி வெட்டு குத்து, கட்டப்பஞ்சாயத்து என ஆக்ஷ்ன் படங்களுக்கே உரிய அலட்டலில்… அதட்டல், உருட்டலாக சென்றாலும், பிற்பாதியில் ரம்மியமான மலைகிராமமும், பிரதிபலன் பார்க்காமல் பிறர்க்கு உதவும் மனதுடைய மக்கள் என கதையை இருவேறு கோணங்களில் வித்தியாசமாகவும், விறுவிறுப்பாகவும் நகர்த்தி சென்றிருப்பதில் இயக்குநர் ஏகன் எல்லா தரப்பு ரசிகர்களின் ஏகாபித்த ஆதரவையும் பெற்று விடுகிறார். அதேநேரம், நான்கைந்து பேரால் நாற்பது, ஐம்பது இடங்களில் வெட்டப்பட்டு ஆற்றில் வீசப்படும் ஹீரோ, நாட்டு வைத்தியத்தால் பிழைப்பது உள்ளிட்ட நம்ப முடியாத சமாச்சாரங்களும் என்னதான் சினிமா என்றாலும், இதுமாதிரி நல்ல படத்திற்கு சற்றே பலவீனமாகத் தெரிவதை இயக்குநர் நினைத்திருந்தார் என்றால் தவிர்த்திருக்கலாம்!

தரமான மணியன் பிரதீப்பின் வசனம், ஜெ.பி.ராஜ்செல்வாவின் ஒளிப்பதிவு, ஏகனின் இசையமைப்பு, இயக்கம் எல்லாமும் சேர்ந்து “உயிரின் எடை 21 அயிரி” படத்தை திரையரங்குகளில் 210 நாட்கள் ஓட வைக்க வேண்டும். இன்றைய சூழலில் அட்லீஸ்ட் 21 நாட்களாவது அரங்கு நிறைந்த காட்சிகளாக அதிர வைக்கும் என நம்பலாம்.

வெவ்வேறு குணாதிசயங்களும், வெவ்வேறு பொருளாதார சூழ்நிலைகளும் கொண்ட ஜெயராம், மீராஜாஸ்மின், ஜெய்சூர்யா, குஞ்சக்கோபன் ஆகிய நால்வரும் புற்றுநோயாளிகள், இவர்களது ஆசாபாசங்களை அந்த கூட்டாளிகளில் ஒருவரான கோடீஸ்வரர் ஜெயராமே நிறைவேற்ற களம் இறங்குகிறார். அவர்களின் ஆசாபாசங்கள் நிறைவேறியதா…? அதற்கு அவர்களின் உள்ளே முற்றிவரும் புற்றுநோய் எந்தெந்த விதத்தில் எல்லாம் தடையாக இருந்தது…? என்பதை கதையாகவும், காட்சிகளாகவும் காண்போரின் விழியோரம் கண்ணீர் எட்டிபார்க்கும் விகிதத்தில் சொல்லியிருக்கும் படம்தான் “அன்புள்ள கமல்!”

இதில் கமல், கெஸ்ட்ரோலில் நடித்திருந்தாலும் அவரது கேரியரில் பெஸ்ட் ரோல்! எனும் அளவு புற்றுநோய் பற்றிய விழிப்புணர்வு ஏற்படுத்தும் ஒரு பாத்திரத்தில் அழகாக மிளிர்ந்திருக்கிறார். அவரை

மாதிரியே ஜெயராம், மீரா ஜாஸ்மின், ஜெய்சூர்யா, குஞ்சக்கோபன் உள்ளிட்ட மலையாள நட்சத்திரங்களும் மலைக்கும் அளவு நடித்து மனதை விட்டு அகல மறுக்கின்றனர். நால்வரின் நடிப்பும், நான்றென்றாலும் வாட்டசாட்டமான அவர்களது உருவம் அவர்களை புற்று நோயாளிகளாக ஏற்றுக்கொள்ள மறுப்பது படத்தின் பலவீனம்!

அணில் அய்யரின் ஒளிப்பதிவு ஓ.கே. எம்.ஜெயச்சந்திரனின் இசை ஒட்டவில்லை! எனினும் சாஜி சுரேந்தரனின் இயக்கத்தில் “அன்புள்ள கமல்”, “அர்த்தமுள்ள கமல்!”

அப்பா, ஜாதிக்காக உயிரைக் கொடுக்க, அவர் வழி வந்த பிள்ளை, விவரம் புரியாத வயதிலேயே ஜாதிவெறி பிடித்து அலைகிறார். எல்லாம் தன்னுடன் படிக்கும் கீழ்ஜாதி ‌பெண் மீது காதல் வரும் வரை தான். தனக்கு அடைக்கலம் தந்த ஜாதி திமிர் பிடித்த தன் மாமாவையே அந்த காதலால், ஒரு கட்டத்தில் எதிர்க்கிறார் ஹீரோ! விடுவாரா ஊர் பெரிய மனிதரான மாமா. ஹீரோவின் காதலியை சீரழிப்பதுடன், காதலியின் அண்ணணையும் அசிங்கப்படுத்துகிறார். இதற்கு பழிக்குபழியாக மாமாவிற்கு நிச்சயிக்கப்பட்ட பெண்ணை அவரது கீழ்ஜாதி காதலருடன் தப்பி பிழைக்க விடுகிறார் ஹீரோ! அப்புறம்? அப்புறமென்ன…? மாமா ஹீரோவை கொன்றாரா? ஹீரோ வென்றாரா? என்பது க்ளைமாக்ஸ்!

பள்ளி மாணவர் மணியாக ஹீரோவாக புதுமுகம் கிரி, ஜாதிவெறி பிடித்த இளைஞனாக காதலுக்கு முன் சீறிப்பாய்ந்திருக்கிறார் என்றால், காதலுக்குப் பின் கசிந்து உருகி தமிழ் சினிமாவில் தனக்கு சரியான எதிர்காலம் இருக்கிறது என்பதை நிருபித்திருக்கிறார். வில்லன் மாமாவாக, ஊர் பெரிய மனிதராக நடிகர் சம்பத்தும், நரம்பு புடைக்க வில்லத்தனத்தில் வென்றிருக்கிறார்.

நாயகிகள் மோனிகா -அஸ்வதா இருவரில் சிலந்தி மோனிகா, ஷகிலா ரேஞ்சுக்கு காதல் காட்சிகள் என்ற போர்வையில் காமக்காட்சிகளில் இறங்கி வந்து நடித்திருக்கிறார் என்றால், தங்கமாக பள்ளி மாணவியாக வரும் அஸ்வதா, சாவித்திரி அளவிற்கு உருக்கமாக நடிக்க முயன்றிருக்கிறார். அன்வராக – ஆதிஷ், நந்தா – விஜய், ரத்னம் – முத்துக்குமார், முனியாண்டி சாமியாக – கராத்தே ராஜா உள்ளிட்டவர்களும் பாத்திரமறிந்து பளிச்சிட்டிருக்கின்றனர்.

ஐசக் தாமஸின் அதிரடி இசை, பிரேம் குமாரின் இருட்டிலும் மிரட்டும் ஒளிப்பதிவு உள்ளிட்டவைகள் படத்தின் பலம்! எஸ்.எம்.ராஜூவின் எழுத்திலும், இயக்கத்திலும் ஆங்காங்கே ஒரு சில லாஜிக் மிஸ்-டேக்குகள் இருந்தாலும் “வர்ணம்” நல்ல “வண்ணம்” புதிய வானம்!!

மீனவ குப்பத்து பெண்ணுக்கும், ஆச்சாரமான அக்ரஹாரத்து வாலிபனுக்கும் இடையே காதல். தன் காதல் நிறைவேற, காதலி குடும்பம் மொத்தத்தையும் பிராமின் வேஷம் போட வைக்கிறார் காதலர். தங்கையின் காதலுக்காக அவரது தாதா அண்ணனும், மொத்த குடும்பத்துடன் மயிலாப்பூர் அக்ரஹாரத்தில் வீடு பார்த்து குடியேறி பிராமின் பாஷை பேச, இருவரது காதல் கைகூடியதா…? இல்லையா…? என்பது க்ளைமாக்ஸ்! ஒரு காதல்கதையை முழுநீள காமெடி கதையாக சொல்லி இருப்பது புதுமை!

ஹீரோ உதயா காமநெடியை நம்பும் ஹீரோக்களுக்கு மத்தியில், காமெடியை நம்பி படமெடுத்து, நடித்து அதில் ஜெயித்தும் இருக்கிறார். அப்பாவிற்கு அடங்கிய பிள்ளையாக, அப்பாவிற்கு பிடித்த திருக்குறள்களை பாடியபடி பக்கவாக நடித்து ஜெயித்திருக்கிறார் மனிதர்! திருக்குறள் மீது பற்று கொண்ட பிராமண பெண்ணாக ஹீரோயின் ஸ்வேதாபாசு, பொண்வண்ணன், தாதா ஆதித்யா, காமெடி நண்பன் சத்யன் என சகலரும் படத்தில் சக்கபோடு போட்டிருக்கின்றனர்.

“அன்பும் அறனும்…” எனத் தொடங்கி தொடரும் திருக்குறள் பாடலில் தொடங்கி, சகல பாடல்களிலும் சபாஷ் வாங்கிவிடுகிறார் இசையமைப்பாளர் ஸ்ரீகாந்த் தேவா ஆர்.சரவணனின் ஒளிப்பதிவும் இனிமை! அறிமுக இயக்குநர் சாண்டில்யாவின் இயக்கத்தில் பின்பாதியில் இருக்கும் விறுவிறுப்பு, முன்பாதி படத்திலும் இருந்திருந்தது என்றால், “ரா ரா” சும்மா “ஜோர் ரா” என்று பேசப்பட்டிருக்கும்!

கதைப்படி, தன் மகனுக்காவது அரசாங்கத்தில் உத்தியோகம் வாங்கி விட வேண்டுமென்பது, படித்துவிட்டு பத்திரம் எழுதும் வேலைபார்க்கும் பாக்யராஜின் வைராக்கியம். அதற்காக மகன் விமலை டீச்சர் டிரையினிங் படிக்க வைத்து காத்திருக்கிறார். அரசாங்க உத்தியோகத்திற்கு முன்னதாக தனியார் கிராமசேவா திட்டத்தின் கீழ் விமலுக்கு, கண்டெடுத்தான் காடு எனும் பொட்டல் காட்டில் வாத்தியர் உத்தியோகம் கிடைக்கிறது. அரசாங்க வேலை கிடைக்கும் வரை அந்த உத்தியோகத்தை பார்க்கலாம் என பொட்டி படுக்கையுடன் புதுக்கோட்டையிலிருந்து புறப்படும் விமலுக்கு, அந்த பொட்டல் காட்டில் எக்கச்சக்க ஆச்சர்யங்களும், அதிசயங்களும், அதிர்ச்சிகளும் காத்திருக்கின்றன. அவற்‌றை‌யெல்லாம் முறியடித்து விமல் எவ்வாறு…? அந்த பொட்டல் காட்டு கிராமத்து சிறுவர்களுக்கு பாடம் சொல்லி தருகிறார் என்பதுதான் “வாகைசூட வா” படத்தின் மொத்த கதையும். இதனூடே அக்கிராமத்தில் டீக்கடை நடத்தி, விமலுக்கு சமைத்தும் போடும் நாயகி இனியாவுடனான காதலையும் கலந்து கட்டி கலக்கலாக கதை சொல்லி இருக்கிறார் இயக்குநர். பலே, பலே..!!

தேங்காய் எண்ணெய் தேய்த்துபடி வாரிய தலைமுடி, மழுங்க ஷேவ் செய்த வழுவழு முகம், அதில் வரைந்த கோடு மாதிரியான மீசை, லூஸ் பிட்டிங்கில் ஃபேண்ட், சர்ட் என 1966-களில் வாத்தியாராக வாழ்ந்த இளைஞர்களை நம் கண்முன் நிறுத்த நிறையவே ஹோம் ஒர்க் செய்திருப்பார் போலும் விமல். அதனால், படத்தில் அப்பாத்திரமாகவே ஜொலிக்கிறார் மனிதர். அக்கிராமத்து மக்களிடமும், குழந்தை தொழிலாளிகளான மாணவர்களிடமும், குறிப்பாக கதாநாயகியிடமும் விமல் படும்பாடு நிறைய காமெடி, கொஞ்சமே கொஞ்சம் காமநெடி, என்பதும் கூட படத்தின் சுவாரஸ்யத்தை கூட்டுகிறது. விமலுக்கு விருதுகள் நிச்சயம்.

கதாநாயகி இனியா, நடிப்பில் கைதேர்ந்த நடிகைகளையே மிஞ்சும் வகையில் விஞ்சி நடித்திருக்கிறார். ஆரம்பத்தில் காசு, காசு என அலைந்து விமலுக்கு சாப்பிட களியையும், கருவாட்டையும் வைத்து ஏமாற்றுவதும், அவர் மீது காதல் வந்தபின்பு காசு பணத்தை பார்க்காமல், கறியும் சோறுமாக ஆக்கிபோடுவதுமாக படம் முழுக்க காதல் மொழி பேசி கலக்கி இருக்கிறார். சில இடங்களில் கண்ணீர் விடவும் வைக்கிறார் பேஷ், பேஷ்!

மகனை அரசாங்க உத்தியோகத்தில் அமர்த்தியே ஆகவேண்டும் என வைராக்கியத்தில் வாழும் பாக்யராஜ், எடக்கு-மடக்காக ஏதாவது கணக்கு போட்டு தன்னை புத்திசாலியாக காட்டிக் கொள்ள முயலும் டூ-போர் ஏட்டு தம்பி ராமையா, ஆண்ட முதலாளி பொன்வண்ணன், அக்கிராமத்தில் செங்கல் மண்ணை கண்டுபிடித்து தன் உறவுகளை வாழவைத்து, பின் மனநோயாளி ஆகி மறையும் குருவிக்காரர் குமரவேல், வைத்தியர் நம்பிராஜன், மகளை விமலிடம் அழைத்து போய் ஒப்படைத்து, இவளுக்கு ஏதாவது சொல்லி கொடு என கதறும் பெண், பொட்டல்காட்டில் சத்தம் போட்டபடி உலாவரும் வெள்ளாந்தி சிறுவர்கள், பச்சைபசேலே தெரியாத பொட்டல் காடு, செம்மண் புழுதி பறக்கும் செங்கல்சூளை என 1966 காலகட்டத்தை படத்தில் கொண்டு வர இயக்குநருக்கு ரொம்பவே உதவி இருக்கிறார்கள் கலை இயக்குநர் சீனு, ஒளிப்பதிவாளர் ஓம் பிரகாஷ் மற்றும் இசையமைப்பாளர் ஜிப்ரான் ஆகிய மூவரும். படத்தில் இந்த மூவரின் பங்கு பெரும்பாங்கு என்றே சொல்லலாம்.

இயக்குநர் ஏ.சற்குணத்தின் எழுத்து-இயக்கத்தில் பின்பாதியில் இருக்கும் வித்தியாசமும், விறுவிறுப்பும் முன்பாதியில் இருந்திருந்தால்,  “வாகைசூட வா” மேலும் ரசிகர்கள் மனதில் குடிகொண்டிருக்கும் என்றாலும், “வாகைசூட வா” “விருதுகளே ஓடிவா” என அறைகூவல் விடுத்திருக்கும் தரமான தமிழ்படம்.

மிடுக்கான போலீஸ் அதிகாரி பாத்திரத்தில் ஐ.பி.எஸ். ஆபிஸராக நந்தா நன்றாகவே நடித்திருக்கிறார். அப்பா ஜி.எம்.குமாருடனான சென்டிமெண்ட், பூர்ணாவுடனான லவ், வில்லன் அழகம்பெருமாள், அமைச்சர் அண்ட் கோவினருடனான ஆக்ஷ்ன் என அத்தனையிலும் புதிய பரிமாணத்தில் மிளிர்ந்திருக்கும் நந்தாவிற்கு நான்கைந்து சபாஷ்கள் சொல்லலாம்.

முத்துக்குமார் ஐ.பி.எஸ்.ஸின் அதாங்க நந்தா காதல் மனைவி ப்ரியாவாக பூர்ணா, தன் பங்கை சரியாக செய்திருக்கிறார். நந்தாவின் ஜீப் ‌டிரைவராக வரும் சந்தானமும், அவரது அப்பாவாக வரும் சிங்கமுத்துவும் செய்யும் காமெடி காட்சிகள் ஒவ்வொன்றும் வயிறு புண்ணாகும் கலாட்டா காட்சிகள். ஜி.எம்.குமார், வில்லன் அழகம் பெருமாள், கோடிகளிலேயே பேரம் பேசும் அந்த அமைச்சர் கேரக்டர் என ஒவ்வொருவரும் பாத்திரமறிந்து பளிச்சிட்டிருக்கின்றனர். பலே, பலே! வெற்றியின் ஒளிப்பதிவு பலம்! சுந்தர்.சி.பாபுவின் இசையும், பாடல்களும் பலவீனம்!

மொத்தத்தில் ஆர்.என்.ஆர்.மனோகரின் எழுத்து இயக்கத்தில் “வேலூர் மாவட்டம்”, கடமை தவறாத “காக்கி வட்டம்” கண்டிப்பாக “கல்லாகட்டும்”!

கதைப்படி சென்னையிலிருந்து திருச்சிக்கு ஒரு தனியார் ஆம்னிபேருந்து புறப்படும் அதே நேரத்தில், திருச்சியிலிருந்து சென்னைக்கு ஒரு அரசு சொகுசு பேருந்தும் புறப்படுகிறது. இரண்டு பேருந்துகளும் விழுப்புரம் அருகே எதிர்பாராமல் நேருக்கு நேர் மோதி விபத்திற்குள்ளாக, அதில் நிலைகுலைந்தும், உயிர் இழந்தும் போனவர்களது சொந்தகதை, சோக கதைகளுடன் சில, பல காதல் கதைகளையும், காமெடி காட்சிகளையும் இணைத்து கலக்கலாக கதை சொல்லி, கண்ணீரை வரவழைத்து விடுகிறார் இயக்குநர் சரவணன். சபாஷ் சரவணன்.

திருச்சியில் இருந்து அரசூர் நோக்கி சென்னை பேருந்தில் பிரயாணிக்கும் ஜெய்-அஞ்சலியின் காதலாகட்டும், சர்வானந்த்-அனன்யாவின் அறிமுகமும் அதைத்தொடர்ந்து அவர்களுக்குள் எழும் காதலுமாகட்டும், இன்னும் புதிதாய் திருமணமான ஒரு பிரியமான ஜோடியின் பிரியமுடியாத காதலாகட்டும், கண்டக்டரின் சதியால் பிரிந்து, பின் இணையும் பேருந்து இளம் காதலர் ஆகட்டும், அந்த சுட்டி குழந்தை ஆகட்டும், அதை அடக்கும் அழகு அம்மாவாகட்டும், அரசூர் ஊர் தலைவராகட்டும், அனன்யாவின் அழகு அக்காவாகட்டும், எல்லோருமே நச் என்ற பாத்திரத்தில், பளிச் என்று நடித்து ரசிகர்கள் மனதை டச் செய்து விடுகின்றனர். பலே, பலே!

ஜெய் முந்தைய படங்களை காட்டிலும் நடிப்பில் முத்திரை பதித்திருக்கிறார். மற்றொருநாயகர் சர்வாவும் தானும் சளைத்தவர் இல்லை என நடித்து சபாஷ் வாங்கிவிடுகிறார்.

நாலு வீடு தள்ளி மாடியில் இருந்து கை காட்டும் ஜெய்யை மடக்கி, காதலும் கண்டிப்பும் காட்டும் அஞ்சலி, ஜெய் உடனான காதலில் நடிக்கவே இல்லை, உண்மையை சொல்வதென்றால் ஜெய்யின் காதலியாக வாழ்ந்திருக்கிறார். எவ்வளவுதான் படித்திருந்தாலும் சொந்த ஊரில் இருந்து சென்னைக்கு வரும் புதிதில் ஒவ்வொருவருக்கும் ஏற்படும் பயத்தை பிரமாதமாக தன் நடிப்பில் காட்டியிருக்கும் “நாடோடிகள்” அனன்யா, சர்வாவுடனான காதல் காட்சிகளிலும் பட்டையை கிளப்பி இருக்கிறார்.

ஒவ்‌வொரு காட்சியிலும் ஆர்.வேல்ராஜின் ஒளிப்பதிவு ஓவியம் என்றால், சத்யாவின் இசை, ஆரம்பகாட்சிகளில் ஏற்படுத்தும் விறுவிறுப்பு, கடைசி வரை பாடல் காட்சிகளிலும் பரபரப்பையும், எதிர்பார்ப்பையும் கூட்டி படத்திற்கு பலம் சேர்த்திருக்கிறது.

படம் முழுக்க எக்கச்சக்க காதல் ஜோடிகளுடன், இனிமையாக ரசிகர்களையும் பிரயாணம் செய்ய வைத்து, க்ளைமாக்ஸில் அந்த ஜோடியை பிரித்து விட்டாரே… இந்த ஜோடியை சேர விடவில்லையே… என எமனையும், இயக்குநர் எம்.சரவணனையும் சபிக்க வைத்திருப்பது தான் “எங்கேயும் எப்போதும்” படத்தின் பெரிய பலம்!

மொத்தத்தில் “எங்கேயும்… எப்போதும்…” படத்திற்கு நிச்சயம் “வெற்றிகளும்… விருதுகளும்…”

கதைப்படி ஒரே அம்மா, இரண்டு அப்பாக்களுக்கு (புரட்சி!) பிறந்தவர்கள் நந்தாவும், ஜீவாவும்! நந்தாவின் அப்பா இல்லாமல் போக, அவரது அம்மாவை இரண்டாவதாக திருமணம் செய்யும் ஜீவாவின் அப்பா, நந்தாவை என்னதான் பெற்ற பிள்ளை போல் பாவித்தாலும், ஜீவாவிற்கே முக்கியத்துவம் அளிக்கப்படுவதாக நந்தாவிற்‌கு சின்ன வயதிலேயே தாழ்வு மனப்பான்மை! அதன் வெளிப்பாடு தம்பியை கிணற்றில் தள்ளிவிட்டு, விவரம் அறியாவயதிலேயே மும்பைக்கு திருட்டு ரயில் ஏறும் நந்தா, அங்கு வளர்ந்து பெரிய தாதா ஆகிறார்.

மும்பையின் மொத்த தாதாக்களுக்கும் பெப்பே காட்டிவிட்டு முதல் இடத்தில்(!) இருக்கும் நந்தாவை தேடி வரும் ஜீவா (சின்னவயதில் கிணற்றில் தத்தளித்த ஜீவாவை ஊரும், உறவும் ஒன்று சேர்ந்து காபந்து செய்வது பிறகு ப்ளாஷ்பேக்கில் வருகிறது…) அண்ணனை திருத்த தன் காதலையே பணயம் வைக்கிறார். ஜீவாவின் அண்ணன் நந்தா திருந்தினாரா? ஜீவாவின் காதல் என்ன ஆனது? நந்தா மீது இருக்கும் கொலை வழக்கு உள்ளிட்ட மும்பை போலீசின் எண்ணற்ற வழக்குகள் என்ன ஆயிற்று…? நந்தா-ஜீவா மீண்டும் இணைய ஜீவாவின் காதலி டாப்சியின் பங்கு என்ன…? என்பது உள்ளிட்ட இன்னும் பல கேள்விகளுக்கு வித்தியாசமாக பதில் சொல்கிறது “வந்தான் வென்றான்” படத்தின் மீதிக்கதை! அதை இன்னும் சற்றே விறுவிறுப்பாக சொல்லி இருந்தால் மேலும் சுவாரஸ்யமாக இருந்திருக்கும் என்பது குறை!

“கோ”, “ரவுத்திரம்” படங்களில் பார்த்த துருதுரு, விறுவிறு ஜீவாவை வந்தான் வென்றானிலும் பார்க்க முடிகிறது சுவாரஸ்யம். அதேநேரம் கதாநாயகி விஷயத்தில் கூட அவர் செய்யும் கற்பனைகள் ஹாஸ்யமாகி போவது படத்திற்கு பலவீனத்தை சேர்ப்பதை இயக்குநர் நினைத்திருந்தால் தவிர்த்திருக்கலாம்.

நந்‌தாவை வில்லன் என்பதை விட வில்லானிக் ஷீரோ எனலாம். ஸ்மார்ட் வில்லன்! விபரம் புரியாத வயதில் தம்பி ஜீவா மீது சினம் கொள்வது ஓ.கே., அதேநேரம் விபரம் தெரிந்து வளர்ந்த பின்பும், தம்பி என தெரிந்தும் அவரை குற்றுயிரும் குலை உயிருமாக விட்டுச் செல்வதெல்லாம் ரொம்ப ஓவர் நந்தா!

அழகி அஞ்சனாவாக டாப்சி, ஜீவாவின் காதலியாக வருகிறார். இவரது பாத்திரம் கற்ப‌ைனை கதாபாத்திரம் என்பதை முன்கூட்டியே ஓரளவு யூகிக்க முடிவது படத்தின் மற்றுமொரு பலவீனம்!

பாம்பே பானிபூரி வாலாவாக வரும் சந்தானமும், அவரது ‌காமெடியும் ஆறுதல், அதுகூட மற்ற படங்கள் அளவு இல்லாதது வருத்தம். ரஸின் ரஹ்மான், மாளவிகா, அழகம்பெருமாள் உள்ளிட்ட எல்லோரும் பாத்திரத்திற்கேற்ற பளிச் தேர்வு! அதே தேர்வை கதை விஷயத்திலும் இயக்குநர் ஆர்.கண்ணன் காட்டியிருந்தால் இன்னும் சிறப்பாக இருந்திருக்கும்! குருநாதர் மறந்துவிட்ட மு‌ம்பை தாதா விஷயங்‌களை சிஷ்யர் கண்ணன் தன் மூன்றாவது படத்தில் கையில் எடுத்திருப்பது ஏனோ புரியவில்லை!

எஸ்.தமனின் அதிரடி இசை, பி.ஜி.முத்தையாவின் அழகிய ஒளிப்பதிவு, கண்ணனின் இயக்கத்தில் எதிர்பாராத புதிய க்ளைமாக்ஸ் எல்லாம் சேர்ந்து, “வந்தான் வென்றான்” படத்தை “வந்தான் போனான்” என்ற அளவில் இல்லாமல் பார்த்து கொள்கிறது! பலே! பலே!!

இந்த கதையை ரசிகர்களின் காதில் எவ்வளவு பூ சுற்ற முடியுமோ அவ்வளவு சுற்றி வளைத்து, காமெடியை மட்டுமே கருத்தில் கொண்டு படமாக்கி இருக்கிறார் இயக்குநர் திருமலை. கருணாஸின் இசை, சேவிலோராஜாவின் ஒளிப்பதிவு, புதியவர் ஷரனின் நடிப்பு, காம்னா ஜெத்மாலனி, கருணாஸ்,

பாண்டியராஜன், திவ்யா, சத்யன், டெல்லி கணேஷ், சிங்கமுத்து, சிங்கம் புலி, மயில்சாமி, பாண்டு, மீரா கிருஷ்ணன், பாபிலோனா என எல்லோரும் நடித்திருக்கிறார்கள். எல்லாமும் இருக்கிறது… ஆனால் பின் பாதியில் இருக்கும் விறுவிறுப்பு முன்பாதியில் இல்லாதது பலவீனம்.கருணாஸின் இசையும், காமெடியுமே பலம்!

மொத்தத்தில் “காசேதான் கடவுளடா”, “‌காமெடி படமடா!” “கடிபப்படமடா!!”

ஒரு நாட்டில் உள்நாட்டு போரில் நீண்ட நெடுங்காலமாக ஈடுபட்டு வரும் போராளிகளை ஒழிக்க, மற்றொரு நாட்டின் ஆயுத சப்ளை நிறுவனம் ஆயுதம் வழங்குகிறது. இதனால் பாதிப்பிற்குள்ளாகும் போராளிகள், தங்கள் நாட்டிற்கு வரும் ஆயுத சப்ளை ஊழியர்கள் சிலரை காலி பண்ண களம் இறங்குகின்றனர். வென்றது போராளிகளா…? உண்மையை உணர்ந்து கொள்ளும் ஆயுதசப்ளை நிறுவன ஊழியர்களா…? என்பது க்ளைமாக்ஸ்! இந்த கதையுடன் காதல், ‌காமநெடி, காமெடி எல்லாவற்றையும் கலந்துகட்டி கலக்கலாக கதை சொல்ல முயன்று, படு லோக்கலாக படுத்தி எடுத்திருக்கிறார் இயக்குநர் ஜெய் ஆகாஷ்! ரசிகர்கள் தான் பாவம்!!

போராளித்தலைவனாகவும், ஆயுதசப்ளை நிறுவன ஊழியர்களில் ஒருவராகவும் ஹீரோ ஜெய் ஆகாஷ், இதில் டபுள் ஆக்ட் வேறு கொடுத்து வெறுப்பேற்றியிருக்கிறார். ஆனால் அவரது எழுத்து, இயக்கம், இத்யாதி, இத்யாதிகளுக்கு நடிப்பு பெட்டர் என்பது ஆறுதல்! படத்திற்கு “ஆயுதப்போராட்டம்” எனப்பெயர் வைத்துவிட்ட காரணத்தால், பாடல்காட்சிகளில் (மட்டும்) எல்லாம் துப்பாக்கியும் கையுமாக ஜெய், போஸ் கொடுப்பது செம காமெடி!

கதாநாயகிகள் ப்ரீத்தி மீனாள், அனிதாரெட்டி இருவருக்கும் நடிப்பை விட அவிழ்ப்பு(துணி)க்கு வாய்ப்பு அதிகம்! அதை இருவரும் சரியாக பயன்படுத்திக் கொண்டு ஜெய்யின் அட்டகாசங்களில் இருந்து ரசிகர்களை காபந்து செய்வது ஆறுதல்! தீப்பெட்டி கணேஷ், சாய்கிரன், அதித் சீனிவாஸ், நீரஜ் புரோகித், சித்திரம் பாஷா உள்ளிட்டவர்கள் ஜெய்க்கு பக்கபலமாக இருந்து ரசிகர்களை மேலும் பாடாய்படுத்தி விடுகின்றனர்.

சாய்சதீஷின் ஒளிப்பதிவு, நந்தன் ராஜின் இசை எல்லாம் நன்றாக இருந்தும், கதையும், களமும், இயக்கமும் சரியில்லாதது வருத்தம்! ஓபனிங் ஃபைட் சீனும், பாடல் காட்சிகளும் பிரமாதம்! பிரமாண்டம்!! க்ளைமாக்ஸில் நடிகர்சங்க போராட்டம் வலிய திணிக்கப்பட்டிருப்பது நாடகம்!

மொத்தத்தில் இலங்கை போராளிகளை கவுரவப்படுத்துகிறேன் பேர்வழி… என களமிறங்கி, இலங்கை இராணுவத்தை காட்டிலும் கொச்சைபடுத்தி இருக்கிறார் நடிகரும், இயக்குநரும், தயாரிப்பாளருமான ஜெய் ஆகாஷ்!

“ஆயுதப்போராட்டம்”, ஆகாஷின் “போர்” ஆட்டம்!

வீட்டுக்கு அடங்காமல், வேலை வெட்டிஇல்லாமல், வீரமும், விளையாட்டுத்தனமாகவும் திரியும் நான்கு இளைஞர்களும், அவர்களுக்கு அடைக்கலம் தரும் ஒருகுடும்பமும் தான் “மதிகெட்டான் சாலை” படத்தின் கதைக்களம். நான்கு இளைஞர்களில் ஒருத்தனுக்கு, சின்ன வயதில் இருந்தே தங்களுக்கு அடைக்கலம் தரும் அந்த குடும்பத்தின் பெண் மீது காதல் வருகிறது. அந்த காதலால் தன் நண்பர்களையும், அந்த குடும்பத்தையும் பகைத்துக் கொண்டு பிரிந்து செல்லும் இளைஞன், சேரக்கூடாத இடத்தில் எல்லாம் சேர்ந்து சீரழிவது தான் “மதிகெட்டான் சாலை” மொத்த படமும்! அப்படி சீரழிந்த இளைஞன், படத்தின் நாயகன், இறுதியில் ஒருதலை காதலில் ஜெயித்தானா…? அல்லது காதலி முன் செத்து ஒழிந்தானா…? என்பது பரபரப்பான க்ளைமாக்ஸில் வித்தயாசமும், விறுவிறுப்பாக சொல்லப்பட்டிருப்பது புதுமை!

கதைநாயகனாக ஆதர்ஷ் எனும் புதுமுகம் நன்றாக நடிக்க முயன்றிருக்கிறார். நடிப்பை விட ஆதர்ஷூக்கு பாட்டும், ஃபைட்டும் பக்காவாக வருகிறது. கதாநாயகி திவ்யா நாகேஷ் இன்னமும் குழந்தை நட்சத்திரமாகவே தெரிவது மைனஸ்!

ஸோலோ காமெடியில் சிங்கமுத்து இளம் மனைவியை இளைஞர்களிடமிருந்து காபந்து செய்யபடும்பாடு செம சிரிப்பு! வடிவுக்கரசி, மீரா கிருஷ்ணன், நரேன், சந்தீப், தமிழ், கிருஷ்ணகுமார், லாவண்யா, ஈரோடு கோபால், சேதுபாரதி, வில்லன் அறிவு, மதன் உள்ளிட்டவர்களும் பளிச் தேர்வு! எஸ்.தாஸின் ஒளிப்பதிவும், ஸ்ரீகாந்த் தேவாவின் பாடல்கள் இசையும் படத்தின் பெரும் பலம்!

மொத்தத்தில் ஜி.பட்டுராஜனின் எழுத்து-இயக்கத்தில் “மதிகெட்டான் சாலை”, ரசிகர்களின் “மதிமயக்கும் சோலை!”

ஊதாரியாக, காதலி கிடைத்ததும் உயர்பவராக கதையின் நாயகர் சூர்யாவாக, நடிகர் சந்தோஷ் நன்றாகவே நடித்திருக்கிறார். ஒரு காதல் செய்வீர், திருரங்கா, உள்ளிட்ட இவரது முந்தைய படங்களில் நடித்திருந்ததை காட்டிலும் மிட்டாயில் மிளிர்ந்திருக்கிறார். உடம்பை சற்றே குறைத்தால் இன்னும் உயரத்தை எட்டலாம் இவர். கதையின் மற்றொரு நாயகராக சந்தோஷின் நண்பராக வரும் பிரபாவும் பிரமாதம். நட்பிற்காக காதலையே தியாகம் செய்ய துணியும் இவரது பாத்திரம் புதுமை!

கதையின் நாயகி பூஜாவாக, புதுமுகம் மாயா உன்னி, குடும்ப குத்து விளக்கு எனும் அளவிற்கு ரொம்பவும் ஹோம்லி! நடிக்கவும் செய்து நன்றாகவும் இருக்கும். அம்மணியை, தமிழ் சினிமாவில் ரொம்பவே எதிர்பார்க்கலாம்! படத்தில் அவரது பெயருக்கு முன் தரப்பட்டிருக்கும் “தேன் மிட்டாய்” எனும் அடைமொழி மாதிரியே இனிக்கிறார்.

மகாநதி சங்கர், சிங்கமுத்து, நெல்லை சிவா, சாம்ஸ், பூச்சி செந்தில், லொள்ளுசபா சாமிநாதன், மீரா கிருஷ்ணன், சேது பாரதி என ஏகப்பட்ட நட்சத்திரங்கள். ஆனால் யாரும் பெரிதாக மின்னாதது “மிட்டாய்” படத்தின் பலவீனம்!

சபேஷ் முரளியின் இசை, நாக கிருஷ்ணனின் ஒளிப்பதிவு இரண்டும் “மிட்டாய்” படத்தை கொட்டாவி விட வைக்காமல் பார்க்க வைப்பது பலம், பலவந்தம். மந்திரம், மாயாஜாலம் எல்லாம்!. இயக்குநர் அன்பு அருள்நிதி, பாரதிராஜாவின் சிஷ்யர் என்பதாலோ என்னவோ, “அடி ஆத்தாடி…” எனும் குருநாதரின் “கடலோர கவிதைகள்” படப்பாடலை ஹீரோயினுக்கு பதில் ஹீரோவை ஆடவிட்டு ரீ-மிக்ஸ் செய்து இருக்கிறார்.

இந்த இனிமையும், க்ளைமாக்ஸ் புதுமையையும் படத்தின் பிற காட்சிகளிலும், குறிப்பாக முன்பாதி காட்சிகளில் புகுத்தியிருந்தால் “மிட்டாய்”, தேன்மிட்டாயாக இனித்திருக்கும். அப்படி இல்லாததால், “பாதி புளிப்பு மிட்டாய்”, “மீதி தேன் மிட்டாய்” ஹீ… ஹீ…!