திரைமலர்

அமெரிக்கா, ஜெர்மனி,ஆஸ்திரியா,ஜமைகா,ஸ்பெயின் என்று பல நாடுகளில் எடுக்கப்பட்ட த்ரில்லர் படம், நைட் அன்ட் டே. (இரவு அல்ல, வீரத்தை குறிக்கம் சொல் நைட்).பல காட்சிகளில் சீட்டின் நுனிக்கு வரச் செய்து, அடுத்து என்ன ஆகுமோ என்று மனதை லயிக்க வைக்கும் படம். இவ்வளவு ஆக்ஷனுக்கும் இடையே மெல்லிய நகைச்சுவை இணைந்து இருப்பது போனஸ் பாயின்ட்.

பிரபல ஹாலிவுட் நடிகர் டாம் க்ருஸ், நடிகை காமரான் டயஸ் படம் முழுவதும் ஒவ்வொரு காட்சியிலும் நம்மை அசத்துகிறார்கள். படம் ஆரம்பித்து சில நிமிடங்களில், போஸ்டன் நகருக்கு செல்லும் பறக்கும் விமானத்தில் டாம் க்ருஸ், தனி ஆளாக, எதிரி கும்பலை த்வம்சம் செய்தும், விமானம் ஓட்டத் தெரியாத அவர் விமானத்தை ஒரு வயலில் (ஒரு தளத்தில் அல்ல) இறக்கி, விபத்தாகி காமரானுடன் வெளியே வருவதும் யதார்த்தமான காட்சிகள்.

போஸ்டன் நகரி்ல், காமரானை அமெரிக்க உளவு நிறுவனம், விசாரணைக்காக காரில் அழைத்துச் செல்கிறார்கள். ஓடும் காரை, எதிரிகள் சுடுகிறார்கள். காரில் உள்ள மற்றவர்கள் குண்டடிபட்டுவிட, பின் ஸீட்டிலிருந்து பதட்டத்தில் காமரான் காரை ஓட்டுகிறார். சில விநாடிகளில், டாம் க்ருஸ் அந்த காரின் மீது குதித்து, கார் பானெட்டிலிருந்தே துப்பாக்கி சண்டை போடுவது த்ரில்லிங்காக இருக்கிறது.

ஸைமன் என்பவர் (விஞ்ஞானி) உருவாக்கும் மிகவும் சக்தி வாய்ந்த பேட்டரியை ஆன்டோனியோ க்வின்டானா என்ற ஸ்பானிஷ் ஸ்பெயின் நாட்டு ஆயுதங்கள் விற்பனை செய்யும் தாதா, எப்படியாவது அந்த பேட்டரியை தான் அடை விரும்புகிறான். ரகசிய ஏஜண்ட் டாம் க்ருஸூம் அவருடன் எதேச்சையாக சேரும் காமரானும் அவனது முயற்சிகளை தடுக்கிறார்கள்.பறக்கும் விமானம், கார்சேஸிங், காரில் துப்பாக்கி சண்டை, தவிர மோட்டார் சைக்கிளில் ஸ்டண்ட்களும் நிறைய வருகின்றன. ஸ்பெயினில் காளை மாடுகள் கும்பலாக துரத்த மோட்டார் பைக்கில் டாம் க்ருஸூம், காமரானும் தப்பிக்கும் காட்சி, மிகவும் அபாயகரமாக படமாக்கப் பட்டிருக்கிறது. வில்லன் ஆன்டோனியோ காரை துரத்தி வரும் காளைகள் தாக்குவதில் அவர் எதிர்பாராத வகையில் இறக்கிறார்.

“நான் நீச்சல் உடையில் எப்படி இருக்கிறேன்?” என்று டாம்மை காமரான் கேட்பார்.” ஒரு வெடி குண்டையே லாவகமாக பிரித்து, சேர்க்க எனக்குத் தெரியும். உன் உடைகளை கழற்றி, இந்த தீவு சூழ்நிலைக்கு ஏற்ப, நீச்சல் உடையை உனக்கு நான் தான் அணிவித்தேன். கண்ணால் எதையும் பார்க்கவில்லை” என்பார். மெல்லிய நகைச்சுவை. அமெரிக்க உளவு நிறுவனத்தின் ஒரு உயர் அதிகாரியே, அரசுக்கு எதிராக செயல்பட்டு அந்த ஸ்பெஷல் பேட்டரியை கைப்பற்ற செயல்படுகிறார். அவரையும் சமாளித்து, டாம் க்ருஸ் அந்த பேட்டரியை காப்பாற்றி, தன் பாஸான பெண் அதிகாரி இஸ்பெல்லிடம் பாராட்டு பெறுகிறார். ட்வென்டியத் செஞ்சுரி ஃபாக்ஸ் நிறுவனத்தின் 75 வது ஆண்டில் தயாரித்து, வெளியிடப்பட்ட வெற்றிப் படம், நைட் அன்ட் டே.

உலகில் மிகவும் அழகான (செக்ஸியான) பெண்கள் லிஸ்டில் பல ஆண்டுகள் முதல் இடத்தையும் தொடர்ந்து முதல் ஐந்து இடங்களுக்குள் தனக்கென்று நிரந்தர இடத்தைப் பிடித்திருப்பவர் பிரபல ஹாலிவுட் நடிகை ஏஞ்ஜலினா  ஜோலி இன்றைய நிலையில், ஹாலிவுட் நடிகைகளில் வியாபார ரீதியாக பெரும் வெற்றி பெறுபவரும் இவர்தான். பலபடங்களில் இவரது அழகை பார்த்திருக்கலாம். ஆனால் இவரது லேட்டஸ்ட் படமான சால்ட் படத்தில் முற்றிலும் மாறுபட்ட ஜோலியை ரசிக்க முடிகிறது.

மயிர்க் கூச்சலெடுக்கும் ஆக்ஷன் சண்டை காட்சிகள் விறுவிறுப்பான கதை அமைப்பு, இவை ஜேம்ஸ் பாண்ட் படத்தின் டிரேட் மார்க்குகள். சால்ட் படத்தில் ஏஞ்ஜலினா ஜோலி, அவற்றை விட நிறைய சாதித்திருக்கிறார்.

எவ்லின் ஸால்ட், ஒரு சி.ஐ.ஏ. ஏஜென்ட். அமெரிக்க அரசின் ரகசிய உளவாளி. வடகொரியாவில் ஒரு சிறைச்சாலையில் அவள் துன்புறுத்தப்படுவது தான் படத்தின் ஆரம்ப காட்சி. அங்கிருந்து அவர் மீட்கப்பட்டு அமெரிக்கா திரும்புகிறார். அமெரிக்காவில் தஞ்சம் அடையும் ஒரு ரஷிய உளவாளி, விசாரணையின் போது, சால்ட் ரஷியாவிற்கு உளவு பார்க்கிறவர் என்று சொல்கிறார். அதைகேட்ட ஸால்ட் அதிர்ச்சி அடைகிறாள். ரஷிய உளவாளி சொல்லுவதை நம்புகிற அமெரிக்க உளவு நிறுவனம், ஸால்ட்டை சந்தேகிக்கிறது. தன் நேர்மையை நிரூபிக்க ஸால்ட் தப்பித்து ஓடுகிறாள்.

ஜேம்ஸ்பாண்ட் படங்களில் அரசு இயந்திரம் முழுவதும் எல்லா விதத்திலும் அவருக்கு துணையாக நிற்கும். உதவிகள் செய்யும். ஆனால் சால்ட் அரசு நிறுவனத்தினரிடம் சரி, எதிரிகளிடமும் சரி, அகப்பட்டுக் கொள்ளாமல், சாதிக்க வேண்டியிருக்கிறது. இறுதியில் மிகப்பெரிய அணு அழிவை நடக்கவிடாமல் தடுத்து தன் நேர்மையை ஸால்ட் நிரூபிக்கிறார்.

ஏஞ்ஜலினா ஜோலி, திரைப்பட கேரியரில் சால்ட் ஒரு சாதனைப் படம் என்றே சொல்லலாம். தனி ஆளாக நின்று, ஜோலி, மயிர்க்கூச்சலெடுக்கும் ஸ்டண்ட்கள் செய்கிறார். அதிகாரிகளால் துரத்தப்படும்போது, ஓடும் டாக்ஸியில் இருந்து குதிக்கிறார். மேம்பாலத்தில் செல்லும் போது ஓடும் லாரியில் குதித்து தப்பிக்கிறார்.

டிராபிக் அதிகமான முக்கிய சாலையில், வரும் நபரை தாக்கி, அவரது மோட்டார் பைக்கில் ஜோலி தப்பிக்கிறார். பைக், கார் சேஸிங், பைக்கில் சாலையில் பறப்பது நன்றாக படமாக்கப்பட்டிருக்கிறது.

ஒவ்வொருமுறை நீண்ட போராட்டத்திற்கு பின், அவர் தப்பிக்கும்போது, ரசிகர்கள் பாராட்டி, கை தட்டுகிறார்கள். கார் சேஸிங் த்ரில்லிங்காக படமாக்கப்பட்டிருக்கிறது. துணை ஜனாதிபதியின் இறுதி சடங்கில் பலத்த போலீஸ், ராணுவ காவலையும் மீறி ஜோலி தனி ஆளாக இருந்து தன் திறமையை வெளிப்படுத்துகிறார். அதேபோல, எதிரிகளின் கப்பலுக்குள் சென்று அனைவரையும் அலட்டிக் கொள்ளாமல் வீழ்த்துகிறார்.

இறுதி காட்சியில், அமெரிக்க ஜனாதிபதியின் நேரடிஆணையில் மட்டும் இயக்கக்கூடிய அணு ஆயுதத்தை, அரசுக்கு எதிராக சதி செய்யும் அதிகாரி அடிபட்டு, நினைவின்றி கீழே விழுந்திருக்கும் ஜனாதிபதியை வலக்கட்டாயமாக தூக்கி, அவரது முழு கைரேகையை பதிய வைக்கும் நேரத்தில், சால்ட், அவரை துருக்கி, சவுதி அரேபியா போன்ற பல முக்கிய நாடுகள் அணு ஆயுதங்களால் தாக்கப்பட்டு பேரழிவு ஏற்படுவதை சால்ட் தடுத்து விடுகிறாள்.

சால்ட் நூறு நிமிடங்களும் விறுவிறுப்பு, ஒன் மேன் ஆர்மி என்பது போல, தனி பெண்ணாக இருந்து ஜோலி செய்யும் சாகசங்களை நிச்சயம் ரசிகர்கள் விரும்பி ரசிப்பார்கள்.

படத்தின் இயக்குனர் பிலிப் நாய்ஸ், ஸ்டண்ட் இயக்குனர் சைமன் கிரேன் சிறப்பாக செய்திருக்கிறார்கள். இந்தப் படத்தின் தொடர்ச்சியாக சால்ட் இரண்டாம் பகுதியும் வர வாய்ப்பு இருக்கிறது.

‘செக்ஸ்’ எனப்படும் அந்தரங்க விஷயத்தில் ஆண்களின் போலி முகத்திரையையும், பெண்களின் முகத்திரையையும் ஒரு சேர கிழித்திட முனைந்திருக்கும் படம் தான் அந்தரங்கம். முகத்திரையை கிழிக்கிறேன் பேர்வழி….என ரசிகர்கள் திரையை கிழித்து பார்க்க தூண்டும் அளவிற்கு அந்த மாதிரி சமாச்சாரங்களையும் அடுக்கி வைத்து வசூலை வாரிக்குவிக்க நினைத்திருப்பது ஓவர் டோஸாகி இருப்பதும் தெரிகிறது.

கதைப்படி, போலி காதலனால் சிவப்பு விளக்கு பகுதியில் தள்ளப்படுகிறாள் கதாநாயகி. அதற்கு உடன்படாத அவள், அங்கிருந்து எவ்வாறு தப்பிக்கிறாள்? அதன்பின் அவள் சந்திக்கும் இன்னல்கள் என்னென்ன? என்பதை அவளே அந்தரங்கம் பத்திரிகையில் தொடராக எழுதுகிறாள். அதன் வாசகனும் அவளது அறை நண்பரும் ஆன கதாநாயகன் அத்தொடரின் நாயகியே தன் அறைத் தோழி தான் என்பதை அவள் வாயாலேயே அறியும் போது அதிர்ச்சியுறுகிறான். நாயகனும் தன் பங்கிற்கு தன்னை பற்றிய ஒரு அதிர்ச்சிகரமான விஷயத்தை நாயகியிடம் சொல்கிறான். அதையும் தொடராக்க துடிக்கும் நாயகியும் நாயகரும் இணைந்தார்களா? அவர்கள் சந்திக்கும் இடையூறுகள் என்ன? நாயகர் பற்றியஅதிர்ச்சிகரமான தகவல் என்ன? என்பது உள்ளிட்ட இன்னும் பல வினாக்களுக்கு படுசுவாரஸ்யமாகவும் படுக்கை ரகசியங்களாகவும் பதில் அளிக்கிறது அந்தரங்கம் படத்தின் மீதிக்கதை!

பல வருடங்களுக்கு முன் பிரசன்னா எனும் பெயரில் சில தமிழ் படங்களில் நடித்து பின் காணாமல் போன இளம் நடிகர், டான் எனும் பெயரில் மீண்டும் கதாநாயகராக மதன் எனும் பாத்திரத்தில் நடித்திருக்கிறார். நடித்திருக்கிறார் என்பதை விட ஆண்விபச்சாரியாக பல ஆண்ட்டி நடிகைகளுடன் படுத்திருக்கிறார் என்பதே சரி. படம் முழுக்க இவர் பண்ணும் சல்லாபங்கள் அந்தரங்கம் படத்தை செக்ஸ் படம் ஆக்காமல் செக்ஸ் படமாக்கி விடுகிறது பாவம்!

மோகனா, பரிமளா என இரண்டு பெயர்களில் புதுமுகம் கமலிகா கவர்ச்சி விருந்தை படைத்திருக்கிறார். கதைப்படியே, இவர் உடலை கட்டி படுக்க உடன்பட மறுக்கிறார். படத்திலோ உடம்பை மட்டுமே காட்டி சி இடங்களில் பயமுறுத்தவும் பல இடங்களில் பரிதாபப்படவும் செய்கிறார். என்னே விநோதம்!? காதல் போர்வையில் பெண்களை ஏமாற்றி விபச்சார குழியில் தள்ளும் வில்லன் ரமேசாக புதுமுகம் சஞ்ஜயும் அவருக்கு வேலை தரும் விபச்சாரக்கூட தலைவி சரசாவாக சிந்துவும் செம திறமை காட்டி இருக்கின்றனர். சபாஷ!

கே. நித்யானந்தத்தின் ஒளிப்பதிவு பட்ஜெட்டிற்கு ஏற்ற படப்பதிவை தந்திருக்கிறது . வன்மொழி படத்தயாரிப்பாளரும், வினியோகஸ்தரமான ஜே.வி.ருக்மாங்கதனின் கதை, திரைக்கதை, வசனம், இசை இயக்கத்தில் சமூக சீரழிவு கலாச்சாரங்களுக்கும், அது ஏற்படுத்திய காய்ங்களுக்கு மருந்து தடவுகிறேன் என்று செம செக்ஸ் விருந்தே படைத்திருக்கிறார். மருந்து விருந்தானால் என்ன ஆகுமோ? அதுவே ஆகி விடுகிறது கடைசியில்…

மொத்தத்தில் அந்தரங்கம் அசிங்கமும் அல்ல! தங்கமும் அல்ல! அவரது “ஆ” தங்கம்! “பி அண்ட் சி” சென்டர்களில் உள்ள “ஏ” சினிமா ரசிகர்களுக்கு “ஜலதரங்கம்”